Patay ang isang 33-anyos na tricycle driver matapos na ito ay saksakin ng isang lalaki habang natutulog sa Barangay Sto. Tomas, Calauan, Laguna kamakalawa ng tanghali.
Batay sa report ng pulisya, mag aalas-12:00 ng tanghali habang natutulog sa kubo sa tabi ng kanyang bahay ang biktimang si Jonathan Parungao y Alvarez ng walang sabi-sabing saksakin ito ng suspek na si Rolly Palic y Allado, 27, sa kanyang dibdib na agad nitong ikinasawi.
Nasakote naman ng mga pulis ang suspek ng aktong tatakas habang hawak pa ang patalim na ginamit sa pananaksak.
Selos ang nakikitang motibo ng mga awtoridad sa krimen na kinasasangkutan ng suspek at live-in partner nito na nililigawan umano ng biktima.