Ano nga kaya ang dahilan at bumagsak ng 44.4 percent ang deployment figures ng sea-based workers noong July?
Ang 44.4 percent ay sobrang malaki kumpara sa 10 percent na ibinaba naman sa land-based sector ng OFWs.
Well, while hindi pa available ang comparative figures month-on-month, malinaw sa datos sa pagsisimula ng taon na ang job cuts ay nangyari sa mga oil rig.
4,000 jobless
Ang latest figures na available ay noong Enero kung kailan umabot sa 4,000 sea-based OFWs ang na-lay off o hindi na na-renew ang kontrata.
Isang oil-rig worker ang ating na-interview, si Ben ng Cainta, na nagsabing apektado talaga sila ng walang humpay na pagbagsak ng presyo ng krudo sa world market.
“Kawawa talaga iyong mga nagbuhay-hari at walang naipon. Hindi kasi namin naisip na mababakante kami ng ganito katagal,” ani Ben, na nagkakasya na lang sa maliit na kita ng kanyang for-hire na van.
300 rigs nagsara
Kagagaling lang ni Ben sa biyahe mula sa Subic nang makapanayam siya ng ating staffer dito sa Usapang OFW.
Kinumpirma ng 40-anyos na OFW na mahigit 300 offshore oil platforms sa North Sea at Norway ang nagsara pati na iyong ino-operate ng mga dambuhalang kumpanya tulad ng Shell, British Petroleum at Conoco.
“Kung hindi ko naisipan na magpundar ng sasakyan, nakatunganga sana ako ngayon. Eh pero madalang pa rin ang biyahe ng mga pauwi ng probinsya,” wika ni Ben.
Seasonal sideline
“Seasonal at sideline lang itong pagbibiyahe. Hindi pwede panghawakan kung may pinapaaral ka na isa o dalawa,” aniya.
Ang pagbaba ng presyo ng krudo ay bunsod din ng pagpasok ng Iran sa eksena matapos ma-lift ang sanctions sa naturang bansa.
Nakadagdag pa kasi ngayon ang Iran sa suplay ng krudo sa pandaigdigang merkado na siya pang lalong nagpapabagsak sa presyo.
Follow Me On Twitter @beeslist. Kung may ipinagsisintir tumawag na sa 551-5165 o mag-email sa usapang_ofw@yahoo.com.