Sinuspinde ng siyam na buwan sa tungkulin ng Office of the Ombudsman si Lipa City, Batangas Mayor Meynardo A. Sabili matapos mapatunayang guilty sa reklamong Conduct Prejudicial to the Best Interest of the Service.
Kaagad namang nagpasaklolo si Sabili sa Court of Appeals (CA) matapos na humingi ng temporary restraining order (TRO) na humihiling na pigilan ang Ombudsman sa kanilang kautusan na ipatupad ang suspension order.
Ang kaso ni Sabili ay nai-raffle sa CA 10th Division kung saan ang ponente ng kaso ay sina Associate Justice Florito Macalino, kasama sina Justices Mariflor Punzalan-Castillo at Zenaida Galapate-Laguilles, bilang miyembro.
Sa 8 pahinang desisyon ng Ombudsman, nilagdaan ni Graft Investigation at Prosecution Officer Kristine Suzanne G. Fineza na inaprubahan ni Ombudsman Conchita Carpio-Morales, iniutos na masuspinde ang alkalde dahil napatunayan na mayroon siyang pananagutang administratibo sa reklamo sa kanya.
“Wherefore, this Office finds respondent Meynardo A. Sabili guilty of Conduct Prejudicial to the Best Interest of the Service and is meted the penalty of Suspension of 9 months from office,” base sa desisyon.
Nag-ugat ang kaso laban sa alkade dahil sa reklamong isinampa noong Marso 12, 2015 ni Oscar Camerino, Efren Camerino, Dionisia Enriquez, Gerardo Enriquez, Conrado Enriquez, Ramon Enriquez, Virgilio Enriquez, Mildren Del Rosario, Nick Del Rosario at Nielbert Del Rosario bilang mga registered owners ng tatlong parcels ng lupa sa Victoria Homes, Tunasan, Muntinlupa City.