Nangunguna na ang Malabon City sa kampan­ya kontra iligal na droga sa buong Metro Manila matapos dagdagan ng komiteng pinangu­ngunahan ng Philippine Drug Enforcement Agency (PDEA) noong Lunes ang kabuuang bilang ng ‘drug-cleared’ barangays na ngayon ay nasa labinlima o mahigit 71% na ng lungsod.

Ayon sa PDEA, kabilang na sa mga ‘drug-cleared’ barangay ang Acacia, Catmon, Bayan-bayanan, Maysilo, Santulan, at Tugatog, bilang resulta ng walang humpay na kampanya ng pamahalaang lungsod kontra iligal na droga, sa pamamagitan ng City of Malabon Anti-Drug Abuse Council, PDEA, at Philippine National Police (PNP).

Nauna nang idineklara ng PDEA ang Brgy. Dampalit, Muzon, Ibaba, Niugan, San Agustin, Baritan, Flores, Concepcion, at Panghulo bilang drug-cleared barangays, habang 100% drug-free workplaces na ang lahat ng 21 barangay sa Malabon.

Nagpahayag na rin si Malabon City Mayor Lenlen Oreta na layunin niyang gawing isa sa mga kauna-unahang 100% drug-cleared cities ang Malabon sa buong Metro Manila sa kabila ng mga paninira ng ilang panig sa pangalan ng lungsod.