Walang makapigil kay La Salle big man Ben Mbala kapag nangangalabaw sa laro.
Suma-tutal, hindi na rin mapipigalan ang paghirang sa kanya bilang Most Valuable Player ng UAAP Season LXXIX seniors men’s basketball tournament.
Nirehistro ni Cameroonian Mbala ang impresibong 92.43 statistical points (SPs), pormal niyang tatanggapin ang highest individual award bago ang Game 2 ng Finals bukas sa Mall of Asia Arena.
Nagwagi ang Green Archers laban sa mahigpit na karibal na Ateneo, 67-65, sa dikdikang Game 1 ng kanilang best-of-three series.
Makakasama ni 6-foot-7 Mbala sa Mythical Five sina teammate Jeron Teng (57.33 SPs), Raymar Jose (53.64 SPs) ng Far Eastern University, Paul Desiderio (55.14 SPs) ng University of the Philippines at Thirdy Ravena (49.14 SPs) ng Ateneo.
Si La Salle guard Aljun Melecio ang susukbit ng Rookie of the Year matapos ilista ang 36.57 SPs.
Nabuo ang Mythical Five awardees base sa statistical points na nakuha sa two-round eliminations.
Pumili ang liga ng best player sa bawat posisyon kaya hindi nakuha si Adamson center Papi Sarr sa Mythical Five.
Pangalawa si Sarr kay Mbala sa statistics.