MGA GIGIL KAY DUTERTE AYAW PATULAN NG PALASYO

Sa gitna ng kaliwa’t kanang upak ngayon na inaabot ni Pangulong Rodrigo Duterte matapos pa­sabugin ang kontrobersiya laban kay Senador Leila de Lima tungkol sa umano’y pagiging immoral at koneksyon sa drug lord sa loob ng New Bilibid Prison (NBP), ipinagkibit-balikat lamang ng Palasyo ang mga batikos laban sa Commander-in-Chief.

Sinabi ni Presidential Communications Operations Office (PCOO) Secretary Martin Andanar sa isang panayam kahapon na karaniwan naman na mabatikos ang isang Pangulo lalo na ng mga taong hindi sang-ayon sa mga nagiging kapasyahan ng Pangulo.

“It really comes with territory wala namang administrasyon na hindi kini-criticize ng mga taong ayaw sa desisyon ng isang Presidente, so, kami e pinagkibit-balikat na lang namin na ganu’n ho talaga.

Tapos ang Presidente po mayroon po siyang duty na gawin po ‘yung kanyang trabaho to portect and serve also the Republic of the Philippines so will just leave it at that with the President kasi siya po talaga ang mayroong wisdom para gawin po ‘yun,” pahayag ni Andanar.

Kaugnay naman sa diumano’y pagpatol ng Pangulo kay De Lima na ikinasimangot ng marami ay ganito ang naging tugon ng Palace official, “simple lang naman ang sagot diyan si Senator po ay hindi na ho siya simpleng babae… siya po ay isang Senator na,” dagdag nito.

Samantala, nagsalita na rin ang grupong Gabriela para ipagtanggol si De Lima.
Ayon kay Rep. Emmi de Jesus, hindi katanggap-tanggap ang ginawa ni Duterte sa kanilang kapwa babae na si De Lima.

Sinabi ni De Jesus na ang personal na away ay hindi makakatulong sa pagresolba ng problema sa droga sa bansa.

“Personal attacks muddle investigation and steer people further away from truth and justice. We urge President Rodrigo Duterte and Senator Leila de Lima to both stick to facts in both the investigations on extrajudicial killings and the probe on drug trafficking and coddling,” ani De Jesus.

Suportado rin ng grupo ang ginagawang imbetigasyon ni De Lima sa extra judicial killing (EJK) sa gitna ng kampanya sa iligal na droga ng administrasyon ni Duterte kaya hindi umano ito dapat masapawan ng personala na iringan ng Presidente at senador.