‘MODEL’ PINATAY!

Matapos ang apat na araw na pagkawala ay natagpuang isa nang bangkay ang isang dalagitang ni-recruit na maging modelo sa isang ilog sa bayan ng Indang, Cavite kahapon.

Pasado alas-nuwebe ng umaga kahapon nang matagpuan ang bangkay ng biktimang si Melissa Magracia, 17-anyos, estudyante ng AMA College sa Dasmariñas City Cavite at residente ng Belvedere Subdivision Tanza Cavite, sa ilog na sakop ng Brgy. Guyam Malaki, Indang, Cavite.

Halos maga na ang b­uong katawan ng biktima nang matagpuan dahil sa hinihinalang matagal na pagkakababad sa ilog na pinag-iwanan ng hindi pa nakikilalang suspek.

Nabatid mula sa I­ndang Municipal Police Station, ilang residente sa Brgy. Guyam ang nakakita sa naka-school uniform na labi ni Magracia.

Nauna dito, Disyembre 6 taong kasalukuyan nang umalis sa kanilang bahay ang biktima upang makipag­kita umano sa isang Lric Mojica, na nag-aalok sa kanyang maging modelo.

Ito na ang huling pagkakataon na nakita ng mga kaanak ang biktima dahil hindi na ito nakauwi ng bahay.

Batay sa salaysay ng mga magulang ni Melissa, nakilala nito si Lric sa social networking sites, ngunit mula ng mawala ang dalagita ay deactivated na rin ang FB a­ccount ni Lric.

Kasunod ng pagkakadiskubre kahapon ng umaga sa bangkay ng dalagita ay inaresto sa isinagawang follow-up operation ang suspek na si Lric Mojica, kahapon ng tanghali sa inuuwian nitong bahay sa Brgy. Harasan sa nasabi ring bayan.

Tumangging magbigay ng pahayag ang suspek hinggil sa pangyayari.

Nakatakda namang isailalim sa awtopsiya ang bangkay ng dalagita upang matukoy ang tunay na sanhi ng kamatayan nito.