Nagkalasug-lasog ang katawan ng isang lasing na lalaki makaraang masagasaan ito ng tren ng Philippine National Railways (PNR) sa Barangay Buli, Muntinlupa City kamakalawa ng gabi.
Kinilala ni PNR Officer-In-Charge Jo Geronimo ang biktima na si Relbin Buhay, 25, at naninirahan sa nasabing lungsod.
Batay sa ulat, dakong alas-7:45 ng gabi nang maganap ang insidente sa Barangay Buli, Muntinlupa City.
Lumalabas sa imbestigasyon na kasalukuyang naka-upo si Buhay sa riles ng PNR site sa bahagi Southbound lane.
Ilang sandali pa, sumiserena na ang dumarating na tren na may Body No. 5, subalit hindi umano umalis ang biktima sa kinauupuan nito.
Nasapul hanggang sa pumailalim at masagasaan ng tren ang biktima at magkalasug-lasog ang katawan nito.
Ayon kay Geronimo, hindi umano napansin ng train operator ang nakaupong biktima hanggang sa masagasaan na nga ito.
Sa ngayon ay masusing inaalam ng mga imbestigador kung sadya bang nagpasagasa ang biktima o dala ng sobrang kalasingan ay nakatulog ito nang nakaupo sa riles kaya hindi namalayan ang paparating na tren.