Nangisay muna bago humandusay sa sarili nitong kamatayan ang isang 23-anyos na lalaki matapos makuryente sa live wire na kasama ng bulto ng electric wire na kanyang nabangga, kamakalawa ng tanghali sa Baseco Compound, Port Area, Maynila.
Hindi na naisalba sa Gat Andres Bonifacio Memorial Medical Center (GABMMC), ang biktimang si Reymar Demain, taga-Block 9, Baseco Compound, Port Area, Maynila.
Sa imbestigasyon ni PO3 Ryan Jay Balagtas ng Manila Police District (MPD)-Homicide Section, dakong alas-12:15 ng tanghali sa may Block 11, Baseco Compound, Port Area, Maynila, habang naglalakad umano ang biktima nang mabangga ang bulto ng electrical wire.
Hindi umano alam ng biktima na may live wire na nakasabit sa ibabang bahagi ng installation wire kaya nakuryente ito. Sa lakas ng impact nangisay pa ang biktima bago napahandusay.
Isinugod ito sa pagamutan pero hindi na naisalba pa.