Pangungunahan ng higanteng si Kai Sotto ang Philippine basketball youth team Batang Gilas na isasagupa sa Southeast Asia Basketball Association U-16 Championship sa may 14-17 sa Smart Araneta Coliseum.
Magiging coming-out party ng 6-foot-11 na si Sotto ang five-day event. Ang 15-anyos na si Sotto ay anak ni dating PBA center Ervin Sotto at nakapag-iwan agad ng imprint sa UAAP juniors division habang naglalaro sa Ateneo Blue Eaglets.
Target ng Batang Gilas na mangibabaw sa torneo na qualifier sa U-16 FIBA Asia Cup.
“Gusto natin siyempre na mag-No. 1 kaya nag-prepare kami mabuti para pagdating ng tournament ready tayo,” ani coach Michael Oliver sa PSA Forum sa Golden Phoenix Hotel kahapon.
Sa session na hatid ng San Miguel Corp., Golden Phoenix Hotel, Accel at Pagcor, pinangalanan nina Oliver at team manager Andrew Teh ang roster ng team.
Makakasama ni Sotto sina Shaun Geoffrey Chiu, Recaredo Christian Calimag, Raven Angelo Cortez, Terrence John Fortea, Rafael Go, McLaude Guadana, Joshua Rafael Lazaro, John Bismarck Lina, Jose Miguel Pascual, Rence Keith Sean Padrigao at Miguel Roy Tan.
May average height na 6-foot-4 at 6-foot-5 ang team na ayon kay Teh ay “tallest U-16 Youth squad assembled in years.”
Makakasagupa ng Pinoys ang Thailand, Singapore, Indonesia at Malaysia.