Naputukan bago mag-Bagong Taon 22 na — DOH

Umakyat sa 22 ang bilang ng mga nasugatan dahil sa paputok, ilang araw bago ang pagsalubong sa Bagong Taon.

Batay ito sa ulat ng Department of Health (DOH), simula alas-6:00 nang umaga noong Disyembre 21 hanggang alas-5:59 nang mada­ling-araw ng Disyembre 27 na mula sa 61 sentinel hospital sa bansa.

Sa kabila nito, sinabi ng DOH na mas mababa pa rin ito ng 35% o 12 kaso mula sa 34 kaso na naitala sa kahalintulad na petsa noong nakaraang taon.
Pinakamaraming naitala mula sa National Capital Region (NCR) na umabot sa anim na kaso; sumunod ang Calabarzon na may apat na kaso at Region 1 na may tatlong kaso.

Ayon sa DOH, ang mga nasugatan ay nasa pagitan ng 4 hanggang 60-taong gulang, at karamihan sa kanila ang mga lalaki na nasa 77% o 17 kaso.

Ang paputok naman na nakasugat sa mga biktima ay boga at luces, na may tig-apat ng biktima, kwitis at piccolo na may tig-dalawang biktima, habang tig-iisa naman ang nabiktima ng 5 star, baby rocket, fountain, kalburo, bamboo ca­non, mini bomb at whistle bomb, at tatlo ang nabiktima ng ‘di natukoy na paputok. (Juliet de Loza-Cudia)