SALT LAKE CITY — Muling ibinaon ng Golden State Warriors ang Utah Jazz 102-91 Sabado ng gabi para ilayo sa 3-0 ang lead sa Western Conference semifinal series.
Na-check ng Jazz sina Stephen Curry at Klay Thompson, pero hindi nila napigilan si Kevin Durant. May pinagsamang 7 for 29 lang sa field at 3 for 15 mula sa 3-point range sina Curry at Thompson, pumutok si Durant ng 38 points at 13 rebounds.
Tumapos si Curry ng 23 points sa 6 for 20 shooting.
Susubukang walisin ng Warriors ang serye sa Game 4 Lunes ng gabi sa Utah pa rin.
“That’s one of the reasons why we welcomed him here,” wika ni Warriors acting coach Mike Brown hinggil kay former MVP Durant. “It’s tough to control a guy who’s 7 feet that can play out on the perimeter and have the ball. Especially when he’s as good as he is in the pick-and-roll.”
Hindi sumama sa Utah si Golden State head coach Steve Kerr dahil nananakit pa rin ang likod.
Lamang pa ang Jazz 75-74 sa kaagahan ng fourth quarter nang magkasa ng 10-4 run ang Warriors at hindi na lumingon. Nagbaon ng back-to-back 3s sina Curry at Durant para itulak ang Golden State sa 92-84 lead 3:04 na lang.
May 29 points si Gordon Hayward sa Jazz, nagdagdag si Rudy Gobert ng 21 points, 15 rebounds.