SAN JOSE DE BUE­NA­VISTA, ­Antique — Iniuwi ng National Capital Region ang 13th straight overall championship sa likod ng pagsungkit din sa mga ­titulo sa secondary at ele­mentary sa pagwawakas kahapon ng Department of Education 60th Pala­rong Pambansa.

Ang Metro Manila ay ginalamay ni Maurice Sacho Ilustre, 16, ng De La Salle Zobel-Muntinlupa na sa pang-apat na sunod na taon ay may historic perfect 7-for-7 sa secondary boys swimming sa Binirayan Swimming Pool.

Sa pitong ­tagumpay sa kanyang events – 200-meter freestyle, 4×400 free relay, 400 free, 200 butterfly, 100 free, 4×400 medley relay at 100 fly — tatlo rito ang record times sa ­18-region interschool sports fest na pinadrinuhan ng ­Philippine Sports Commission at ng lalawigan ng Antique na tinawag na “where the mountain meets the seas.”

Umibabaw ang NCR sa 66-45-26 gold-­silver-bronze haul sa high school at 32-21-19 sa primary level. Malayong kabuntot sa pangkalaha­tan ang IV-A Southern Tagalog Calabarzon (41-57-57) at VI-Western ­Visayas (38-29-40).

Naka-23-30-35 ang STCAA at may 20-13-21 ang WV para rin sa 2-3 finishes sa high school. Sa elementary ay No. 2 ang XII-SOCCSKSARGEN at no. 3 ang Cala­barzon sa kumpetisyon para sa 18-and-under student-athletes.

“Syempre masayang-masaya po dahil kahit papaano ay makakapag-iwan ako ng standard sa Palaro,” bulalas ng three-time Most Outstanding Athlete ng Palaro na si Ilustre na nasa seventh stint niya rito.

Pakitang-gilas din sa Big City ang schoolmate ni Ilustre na si Meah ­Nicole Pamintuan na may six gold sa HS girls swim, samantalang sa ele­mentary ang mga naka-limang gold sa gymnasts (artistics) na sina Karl Jahrel Eldrew Yulo at Lucia Gabriel Gutierrez.

Nagtrangko sa STCAA ng secondary boys si Veruel ­Verdadero na naka-gold sa 100m, 200m at 400m, at 4x100m at 4x400m relays.