SAN JOSE DE BUENAVISTA, Antique — Nagsosyo agad-agad sa limelight sina Western Visayas bet James Lozañes at Jay Ann Labasano ng Northern Mindanao sa pag-arangkada ng 60th Palarong Pambansa athletics kahapon sa Binirayan Sports Complex track and field sa ilalim nang mainit na klima rito.
Ubos-lakas na sumibat ang nangangarap maging pulis na 17-taong-gulang na si Lozañes, nakatakdang mag-grade 10 sa pasukan sa Estancia National High School sa Iloilo City, ng 59.46 meters sa third attempt sa secondary boys javelin thros.
Tinabunan niya ang 57.81m 2013 Dumaguete Palaro mark ni Bryan Jay Pacheco ng Central Luzon.
1-2 finish ang Region 6 bets, silver ang teammate ni Lozañes na si Ronald Lacson (57.30), bronze si Manny Maquiling (54.66) ng Northern Mindanao.
“Masaya dahil first time kong maglaro sa Palarong Pambansa at nag-WV Regional champion din ako,” hirap na hirap na magwikang Tagalog ni Lozañes, newbie sa sport dahil natuto lang mag-javelin noong January, pang-anim sa pitong anak ng mangingisda’t maybahay.
Nagawa niya rin ang tagumpay sa kabila na rubber shoes ang gamit sa halip na spike shoes dahil sa aniya’y nagpapabagal sa kaanya ang spike.
Ang isa sa walong supling naman ng magsasaka ng mga kamote, ang 17-anyos at bagito rin sa Palaro na si Labasano, ang naging unang gold winner sa secondary girls athletics sa pamamayagpag sa 3,000m run sa clocking na 10 minutes, 32.67 seconds.
Kakatuklas lang sa kanya nang siya’y grade 10 sa isang intramurals at may isa’t kalahating buwan lang sa event sa panalong naitala laban kina Jie Anne Calis (10:41.15) ng NCR at Ma. Junaliza Abutas ng Ilocos o Region 1 (10:44.68).
“‘Di ko talaga ini-expect na mananalo ako” matipid na bulalas ng grade 11 sa Don Manolo Fortich, Bukidnon. “Sa last two rounds sabi ni coach ‘bumuga ng bumuga ako.’”
Naka-ginto rin sina Ma. Sally San Jose ng Calabarzon sa elementary girl’s shot put sa 10.70m at Cesar Fernandez ng Negros Island sa high school boys triple jump sa 1.90m.