Puntirya ni WBO Light Flyweight champion Donnie ‘Ahas’ Nietes na sikwatin ang bakanteng IBF flyweight crown, kaya naman haharapin nito si Komgrich Nantapech ng Thailand sa ‘Pinoy Pride 40: Domination,’ sa Sabado ng gabi sa Waterfront Cebu City Hotel and Casino.
May kartang 39-4-1, 22KOs si Nietes, pakay nitong tuklawin ang korona ng 112-lb division para isama sa koleksyon niya na kinabibilangan ng sinturon sa WBO Inter-continental Featherweight division.
Iniwan ni Nietes ang Light Flyweight division na pinagharian niya mula 2004 hanggang 2015.
Sakaling pataubin ni Nietes si Nantapech (22-3; 15KOs), ito ang ikatlong dibisyon na hahawakan niya.
Bukod kay Nietes, aakyat na muli sa ring ang kanyang stablemate sa ALA Boxing Gym na si Mark ‘Magnifico’ Magsayo (15-0; 11KOs), makakalaban niya ang beterano mula sa Tanzania na si Issa Nampepeche (24-7-4; 11KOs) sa undercard ng ‘Pinoy Pride 40: Domination.’
Nasa 16th ang ranking ni Magsayo sa lahat ng mga featherweight sa buong mundo, habang number one naman sa mga Pilipino.
Target niyang maka-angat sa rankings at makakuha ng laban para sa kampeonato pero kailangan nitong talunin ang Tanzanian boxer sa 10-round match nila.