Sa pangunguna nina Faith Nisperos at Necole Ebuen raratsada pa ang Ateneo de Manila University at Arellano University sa 3rd Premier Volleyball League Collegiate Conference 2019 elims sa triple-header ngayong Sabado sa The Arena-San Juan City.
Makakatapat ng National Collegiate Athletic Association AU Chiefs (2-0) ang Far Eastern University (1-1) sa alas-10:00 ng umaga, habang toka sa alas-12:00 ng tanghali sa University Athletic Association of the Philippines ADMU Lady Eagles (2-0) ang San Beda University (1-1).
Tumuka si Niesperos ng 25 points para pangunahan ang mga Atenista sa pagtumba sa San Sebastian College nitong Martes, 25-17, 25-17, 25-8.
Pumalo naman ng 22 markers si Necole Ebuen nang hampasin ng Legarda-based volleybelles ang Lyceum of the Philippines University sa parehas na petsa, 25-23, 12-25, 25-21, 25-21.
Sa alas-8:00 ng umaga ang tipanan ng College of Saint Benilde (1-1) at LPU Lady Pirates (0-2). (Janiel Abby Toralba)