No parking, no car tama lang

Tama lang.

Ito naman ang tugon ng Metropolitan Manila Development Authority (MMDA) sa panukalang magpaparusa sa mga bibili ng sasakyan na wala namang garahe.

Sa pamamagitan ni MMDA Traffic Engineering Center Director Noemi Recio, sinabi nito wala siyang nakitang masama sa naturang panukala bagkus ito umano sa tingin niya ang tamang paraan upang makatulong sa pagresolba sa problema ng trapiko.

Tama lamang umano na kapag walang paradahan ay huwag nang maghangad pang magkaroon ng sasakyan dahil makakaabala lamang sa ibang tao.

“Tingin ko naman tama, kung wala kang par­king, huwag ka nang mag-ambisyon na magkaroon ng sasakyan dahil makakaabala ka lang ng ibang tao,” ayon kay Recio.

Ayon pa kay Recio, mas marami ngayon ang may sasakyan ngunit wala namang paradahan kung nakaparada at nakaharang sa mga kalsada at ito ang isa sa nakadagdag ng trapik.

Dahil dito, panahon na upang mabigyan na rin ito ng lunas.

Sa panukalang isinulong sa kongreso na kilala sa tawag Proof of Parking Space Act ay pagmumultahin ng P50,000 ang mga walang parking space at ipinaparada lamang sa gilid ng kalsada ang kanilang sasakyan.