Lahat talaga ng paraan ay ginagawa ng Philippine National Police (PNP) para masawata ang iligal na droga sa ating bansa.
Bukod sa tuluy-tuloy na anti-illegal drug operations ay nakatutok din ang liderato ng PNP sa performance ng mga chief of police ng iba’t ibang kapulisan sa ating bansa kung nakakatugon ba sila sa kampanya ng pamahalaan kontra iligal na droga.
Ang mga walang kakayahang chief of police (CoP) na labanan ang problema sa iligal na droga sa kanilang nasasakupan ay sibakin sa puwesto.
Sa katunayan, mukhang magbubuwena-mano sa sibakang ipatutupad ng PNP ay ang mga CoP sa Bicol Region.
Sabi sa ulat, aabot daw sa mahigit 20 CoP sa Bicol Region ang nanganganib na matanggal sa puwesto dahil sa pagkukulang sa anti-drug campaign ng kapulisan.
Ang mga sisibaking CoP ay mga hindi nagpamalas ng magandang performance pagdating sa operasyon laban sa iligal na droga at pagkukulang sa programa ng PNP na Oplan Tokhang na lumilipol sa mga sangkot sa iligal na droga.
Saludo tayo sa hakbanging ito ng PNP, ang mga hepe ng bawat istasyon o presinto ang dapat talagang managot sa kanilang nasasakupan.
Kung matino ang binabantayang distrito o presinto aba’y ibig sabihin nito ay may K ang pinuno rito. Pero kung wala talagang kakayahang sawatain ang problema sa iligal na droga ay hindi na dapat pang pinatatagal sa puwesto dahil baka maging bahagi pa ito ng pagpapalawak sa operasyon ng sindikato ng iligal na droga.
Ang suhestyon ko lang bakit hindi gawing regular ni PNP Chief Ronald Dela Rosa ang pagsukat sa performance ng mga chief of police sa buong bansa upang sa gayon ay agad na matukoy kung sino ang dapat at hindi dapat na mamuno at palitan ng mas karapat-dapat na CoP.
Epektibo rin itong paraan para maramdaman ang maigting na suporta sa drug campaign ng kasalukuyang administrasyon.