Noynoy walang liability sa MRT-3; nagpabaya lang — Poe

Pnoy

Sa bisperas ng imbestigasyon ng Senate Committee on Public Services sa dalawang kontrata ng Metro Rail Transit-3 (MRT3) na ikinasa ng nagdaang administrasyon, agad namang inabsuwelto ng pinuno ng komite si ­dating ­Pangulong ­Benigno “Noynoy” Aquino III.

Nanindigan si Sen. Grace Poe, chair ng komite, na hindi ­maaaring kaladkarin ang dating Pangulo sa transaksyong pinasok ni dating Transportation Secretary ­Joseph Emilio Abaya.

“Kung sa bawat pagkakamali ng iyong kalihim ay ikaw ay pwedeng masentensyahan ay wala na talagang Pangulo na matitira dito sa ating bansa na hindi nakukulong,” katuwiran ni Poe kung bakit hindi maaaring isabit ang dating Pangulo sa MRT mess.

Ang naging pagkakamali lang umano ng dating Pangulo ay nang pabayaan nito si Abaya dahil sa palpak na trabaho nito sa Department of Transportation and Communication (DOTC) lalo na sa MRT-3.

“Noon pa kasi nakikita natin ang kakulangan sa trabaho na ginagawa noon ni Sec. Abaya.

Pasensya na pero matagal ko ng sinasabi na ang bagal nilang kumilos sa DOTC noon. Palpak ‘yung mga nagiging desisyon nila pero nanatili pa rin siyang kalihim ng ilang taon,” paliwanag ni Poe sa isang programa ng himpilang DzBB.

Dalawang isyu ang kakalkalin ngayon ng komite – ang P3.8 bilyong kontrata sa Dalian Locomotive and Rolling Stock Company ng China para sa pagbili ng 48 bagon ng MRT-3 at ang P3.8 bilyong maintenance contract sa Busan Universal Rail Inc. (BURI) para sa pagmantine ng 73 bagon ng MRT at overhaul ng mga makina nito.

Dahil dito, naka­tengga lang at hindi mapakinabangan ang mga bagong bagon o LRV ng MRT-3 habang ang mga lumang tren, panay ang aberya dahil sa kawalan ng karanasan ng maintenance provider.