GUIMBA, Nueva Ecija — Kamatayan ang sinapit ng isang drug personality na hinihinala ring miyembro ng ‘gun for hire’ makaraang paputukan ang mga pulis na nakabantay sa checkpoint sa kahabaan ng Guimba-Pura road sakop ng Bgy. San Rafael dito kahapon ng madaling-araw.

Batay sa ulat ni P/Supt. Recie Duldulao nakilala ang biktima na si Rufino Ramos Avila Jr., 35-anyos, residente ng Bgy. Saranay sa bayang ito.

Nabatid sa pagsisiyasat ni PO2 Rowell de Guzman na alas 12:15 ng madaling-araw nang mangyari ang insidente habang ang mga elemento ng 1st Manuever Platoon ng Provincial Public Safety Command sa pamumuno ni P/Inspector Wilson Kimmayon ay nagsasagawa ng anti-criminality checkpoint sa lugar ay pinapara ang nakamotorsiklong si Avila.

Sa halip na huminto ay bumunot umano ng caliber .38 ang suspek at binaril ang mga pulis na napili­tang gumanti ng putok at napuruhan si Avila na nasawi noon din.

Nakarekober ng SOCO team ang isang caliber .38 revolver na ma 2 live ammos at 4 basyong bala; isang sling bag na naglalaman ng 11 plastic sachet ng shabu, 2 disposable lighters, isang maliit na kahon na nag­lalaman ng 8 gramo ng shabu na nagkakahalaga ng P27,000.