Pacquiao kinuyog sa unang privilege speech sa death penalty

Mistulang kinuyog kahapon ng mga senador si Sen. Manny Pacquiao matapos na magbigay ito ng kanyang ­unang privi­lege speech at isulong ang pagbabalik ng parusang kamatayan sa pamamagitan ng pagbigti­, firing squad o kahit na pugot-­ulo para sa drug traffickers.

“Mas magiging epek­tibo ang pagpapatupad ng batas kung lalagyan ito ng pangil, pangil na agad magpapahinang loob sa mga nagbabalak pa lamang gumawa ng kalokohan,” giit ng boxing icon.

Tulad ng bangasang laban sa lona, hindi naman umatras si Pacquiao nang mag-interpellate sa kanya­ sina Senate Majority Leader Vicente ‘Tito’ Sotto III, Sens. Joel Villanueva, Leila de Lima, Gregorio Honasan, Risa Hontiveros at Francis ‘Kiko’ Pangilinan.

Sa pagtatanong ni Sotto, inusisa nito si Pacquiao kung sa anong paraan niya ipapatupad ang death ­penalty dahil mayroong nagsasabi ng death by hanging, firing squad at lethal injection.

Tinanong ito ni Sotto dahil sa ilalim ng Section 19, Paragraph 1 ng 1986 Constitution ay bawal ang “cruel, degrading and ­inhuman punishment”.

“Ito ang nakapigil sa amin noon para ibalik ang electric chair,” paglalahad ni Sotto.

Humugot naman ng verse sa Bibliya si Pacquiao para idepensa ang kanyang panukala sa pagsasabing kahit na ang Pa­nginoon, pinapayagan ang pagpugot ng ulo sa mga taong nagkasala.

“In the Bible, it’s sword, meaning to say cutting the head. God is allowing that to cut the head when you are punished by death,” giit ni Pacquiao na nagdugtong pang ipinagbabawal sa mga doktor na magbigay ng lethal injection.

“Para po sa akin, nananaig ang hanging o fi­ring squad…sisipain lang ‘yung upuan (sa death by hanging),” sagot naman ni Pacquiao sa tanong ni Sotto kung ano ang pinapaboran niyang paraan.

Maging ang dating kalihim ng Department of Justice na si De Lima, kinuwestiyon ni Pacquiao kung bakit mahigpit itong tumututol sa panukala.

“I’m against death penalty on legal, moral­ basis. On legal, moral and human rights perspective,” sagot ni De Lima.

“Right now, I’m not satisfied but we will finished it in the committee meeting,” buwelta naman ni Pacquiao.

Ginisa rin ni Sen. Pa­ngilinan si Pacquiao kung saan nilektyuran niya ito na iba ang pagkakaintindi ng huli sa abolition ng death penalty, bagay na tinanggap naman ni Pacquiao ang kanyang pagkakamali.

Nasa tabi ni Pacquiao ang tatlo nitong staff para magbigay ng datos sa mga itinatanong sa kanya ng anim na senador na nag-interpellate. Umabot ng halos dalawang oras ang pagsalang ni Pacquiao sa privilege speech at pagtatanong ng mga senador.