Buo na ang quarterfinal cast at pairings sa PBA Governors’ Cup makaraan ang sorpresang pagresbak ng Phoenix sa Rain or Shine, 105-94, at pagbundol ng Meralco sa Mahindra, 104-99, sa double playoff games kagabi sa Smart Araneta Coliseum.
Abante ang Phoenix sa Last Eight at tokang makabangga ang elims topnotcher TNT KaTropa (10-1).
Nasipa ang reigning Commissioner’s Cup champion Elasto Painters, nalagot ang 12 straight playoffs appearance pati ang nine consecutive Final Four stint.
Ang iba pang mga maglalabu-labo para sa semifinals ng season-ending conference ay ang No. 2 at defending champion San Miguel Beer vs. No. 7 NLEX, at third seed Ginebra vs. No. 6 Alaska.
“Whole week it was hard on my veterans, Cyrus (Baguio) was struggling, Willie (Wilson) was struggling, Josh (Urbiztondo) was struggling. They delivered today. We knew what Eugene (Phelps) could do,” litanya ni Fuel Masters coach Ariel Vanguardia.
Humarabas si Phelps ng 40 points at 14 rebounds. May 23 points si Urbiztondo, at naka-10 rebounds at nine points si Wilson sa buong larong dominasyon sa E-Painters.
Sa first game, ang matagal nang hinihintay ni Meralco import Allen Durham na local support ay dumating din kagabi sa Big Dome.
Rumesponde si Jared Dillinger, nilista ang 12 sa kanyang 22 points sa fourth quarter at naligtasan ng Bolts ang makulit na Mahindra, 104-99, para upuan ang No. 4 sa quarterfinals.
Namuno pa rin sa Meralco si Durham sa tinikadang 34 points — 11 sa payoff period, pero hindi matatawaran ang kontribusyon nina Dillinger, Baser Amer at Chris Newsome.
Ang resulta: Twice-to-beat ang hukbo ni coach Norman Black sa next round, muli silang magkikita roon ng Enforcer sa Sabado sa Ynares Center sa Antipolo.
“We expect another tough game from them,” puna ni Black. “All our games against Mahindra this year have been tough, so we expect nothing less on Saturday.”