Itinuturo na ang negos­yanteng si Peter Lim ang big time supplier ng illegal na droga ng grupo ni Kerwin Espinosa na distributor ng shabu sa Visayas.

Ito ang nilalaman ng apat na pahinang referral letter ng Major Crimes Investigation Unit ng PNP-CIDG kay Justice Secretary Vitaliano Aguirre na nagla­laman ng detalye ng reklamong kanilang isinampa laban kina Lim, Peter Co, Espinosa at iba pang personalidad na sina­sabing sangkot sa kalakaran ng ilegal na droga sa Regions 7 at 8.

Nabatid sa PNP-CIDG, ito ay ibinunyag ng pinagkakatiwalaang tauhan ni Espinosa na kanilang naaresto sa isang buy-bust operation noong Hulyo 8, 2016 sa Albuera, Leyte na sina Lim at Co ang supplier ng droga ng Espinosa Group.

Ayon umano kay Marcelo Adorco, tig-20 kilo ng droga ang nakuhang suplay ng Espinosa Group mula kina Co at Lim.

Noong 2014, apat na kaparehong transaksyon ang nangyari sa pagitan ni Lim at ng Espinosa Group.

Noon umanong Hul­yo, 2015, nag-deliver si Lim ng 50 kilo ng shabu sa Espinosa Group at ito ay batay na rin sa napagkasunduan nila ni Kerwin Espinosa sa Thailand noong Hunyo 4, 2015.

Lahat umano ng delivery ng shabu ay nangyari sa Cash and Carry sa Makati City.

Tinukoy pa ng PNP-CIDG sa kanilang reklamo na ang Peter Lim na sangkot sa illegal drug trade ay ang negosyante sa Cebu City na nakipagkita kay Pa­ngulong Rodrigo Duterte noong Hulyo 2016.