Pilipino o Maharlikan?

Nuong nakaraang Huwebes, dumating ako sa Pinas galing sa isang bahagi ng Japan na anim na oras ang biyahe pabalik. Mula NAIA pauwi ng bahay, inabot po ako ng apat na oras bago nakauwi ng bahay. 10 hours all in all. Para ho akong bumiyahe papunta ng LA. Tapos narinig ko na pinapulsuhan ni Carlo Mateo sa palatuntunang Bangon na Bayan kahapon sa superradyo dzbb, kung ok ba sa inyo na baguhin ang pa­ngalan ng Pilipinas at tawagin itong Maharlika. Ang mga Pilipino gusto ng ipatawag na Maharlikans. Langya, ayusin ninyo muna problema ng trapik!

Isa sa mga naobserbahan ko sa Japan ay ang kanilang pagiging mindful of others. ‘Yung kanilang pagmamalasakit sa ibang tao. Hindi ho sila nakakaramdam ng entitlement. Isang simpleng halimbawa: Pagkatapos nilang kumain sa fastfood, nililinis nila ang kanilang pinagkai­nan at isinasauli nila ang pinagkainan sa dapat nitong kalagyan. Regardless kung ano ang social status. Mahirap, mayaman, may trabaho o wala, tauhan o amo. Matutuwa ka naman, ang Pilipino, ganundin pag nasa Japan. They turn Japanese when they are in Japan. Pero pag sa Pilipinas, bakit ko itatabi ito? Eh may serbidor na dapat nagliligpit nito para sa akin.

Ang sense of entitlement ng mga Pilipino ang tindi. Sa tuwing may nagsasabi sa amin, ay buti na lang nagkaanak kayo para meron ng mag-aalaga sa inyo. Ganu’n ba ang pag-aanak? Para pahirapan mo ang anak mong alagaan ka? Ang anak ba ay puhunan para sa iyong pagtanda? Para meron magsusutento sa iyong pagtanda? Kawawa naman ang anak mo. Vicious cycle na lng ang mangyayari. Dahil hindi nakapag-ipon ang anak mo sa pagsustento sa’yo, sisingilin naman niya ang kanyang anak. Paulit-ulit na lang.

‘Yan ang masamang katangian ng mga Pilipino na sinsa­mantala ng mga politiko. Ang ating sense of entitlement. Kaya patuloy tayong gagawing timawa ng mga politikong ito dahil paulit-ulit natin silang binoboto.

Regardless kung anuman ang itawag nila sa atin, Pilipino, Maharlikan o ano pa man. At kailan kaya darating ang panahon na ang lahing Pilipino o Maharlikan ay tatawaging “lahing magaling”?