Humaba ang preparasyon Ateneo at La Salle matapos maurong ang banatan sa UAAP Season 79 women’s volleyball Finals.

Pang-anim na sunod na taong magkukrus ang ­landas sa kampeonato ng mahigpit na magkaribal.

April 29 sa Mall of Asia Arena ang orihinal na iskedyul ng Game 1, pero dahil sa ASEAN Summit sa April 26-29 ay sa May 2 sa Araneta Coliseum na ang siklab ng best-of-three showdown sa pagitan ng defending champion Lady Spikers at Lady Eagles.

Damay din ang Game 2 na sa May 6 na ilalarga sa Big Dome din, at kung may Game 3 ay sa May 10 ilalaro.

At para bigyang-daan ang UAAP Finals, mula sa dating April 28 na schedule ay sa May na ang Clash of Heroes volleyball event sa FilOil Flying V Centre sa San Juan pa rin.

Ang one-day exhibition games ay basehan ng ­national coaches sa pagpili ng players sa men’s at women’s national teams na isasabak sa Southeast Asian Games sa August.

“In deference to the UAAP finals between Ateneo and La Salle, the PSC-POC Media Group and LVPI decided to move the Clash of Heroes to a later date, probably second week of May or as soon as the UAAP champion has been crowned,” anang statement ng organizers PSC-POC Media Group at ­Larong Volleyball sa Pilipinas, Inc.

Nasa women’s national pool sina Lady Spikers Kim Dy, Kim Fajardo at Dawn Macandili.

May mga ulat ding iimbitahan sa tryouts sina Lady Eagles Jia Morado, Maddie Madayag at Kat Tolentino.