Publiko inalerto sa tamang pag-tokhang

Inalerto ng National Capital Region Police Office (NCRPO) ang publiko laban sa mga sindikato o tiwaling pulis na ginagamit ang Oplan Tokhang o Oplan Taphang ng Phi­lippine National Police (PNP) sa iligal na gawain.

Tinukoy ni NCRPO Chief Director Oscar Albayalde ang pagtawag ng mga salarin sa cellular phone ng bibiktimahin at hihingan ito ng pera.

Ani Albayalde sa oras na pumalag o tumangging magbigay ang potential victim ay babalaan i-Oplan Tokhang.

Binigyang diin ni Albayalde na hindi kasama sa standard operating procedures (SOP) para sa Oplan Tokhang o Oplan Taphang ang pagtawag sa cellphone ng hinihinalang drug suspect. Pormal na iimbitahan ito sa pamamagitan ng sulat lalo kung may reklamo laban sa indibidwal.

Kapag tumanggi ito sa imbitasyon ay karapatan nya at hindi pwedeng ipilit ng pulisya, kasabay ng karapatan din nitong kumuha ng abogado.