Mga laro ngayon (PhilSports Arena)
4:00 p.m. Creamline vs. Power Smashers (Battle for 3rd)
6:30 p.m. — BaliPure vs. Pocari Sweat (Finals)
Ibabandera ng defending champion Pocari Sweat si super import Krystal Rivers laban sa BaliPure ngayong araw sa simula ng Premier Volleyball League Reinforced Conference best-of-three finals sa PhilSports Arena sa Pasig.
Dumating ang International Transfer Certificate (ITC) ni Rivers noong Huwebes, nalaman nila ito sa kalagitanaan ng second set habang nakikipagbangayan sila sa Power Smashers.
Tinalupan ng two-time champion Lady Warriors ang Power Smashers sa tatlong sets sa decing game ng semis.
Sa pagpasok ni Rivers, mababawasan ang mabigat na trabahong naka-atang kina American reinforcement Michelle Strizak at local ace Myla Pablo.
“Sobrang malaking bagay na makakalaro na si Rivers dahil may katulong na naman kami,” pahayag ni Pablo.
Pinalitan ni Rivers si Bosnian Edina Selimovic na nagkaroon ng hamstring injury sa preliminary round.
Impresibo ang performance ni former University of Alabama standout Rivers sa kanyang mga nilaruan sa ibang bansa.
“Mayayanig ka sa lakas ng palo ni Rivers,” ani Pablo.
Magkakaldagan sa battle for third ang Creamline at Power Smashers sa alas-4 ng hapon.