Pinahaba ng defending champion Pocari Sweat ang winning run sa lima matapos hablutin ang mahirap na 25-17, 25-17, 22-25, 18-25, 15-3 panalo ­laban sa Perlas kahapon sa inaugural Premier Volleyball League Reinforced Conference sa FilOil Flying V Centre sa San Juan.

Nirehistro ni Myla Pablo ang 26 points at nilista ng Lady Warriors ang 5-2 karta, ipinalasap sa Spikers­ ang pangatlong talo sa anim na laro.

Siniguro ng Pocari ang panalo matapos itarak ang 10-1 abante sa deciding set.

Nakaporma na sa three-set victory ang Lady Warriors matapos hatawin ang 16-10 sa second technical timeout sa third frame, pero nag-iba ang ihip ng ­hangin pagbalik ng laro.

Kumana ng 11-3 run ang Spikers para makuha ang manibela, 21-19.

Tinabla muna ng Lady Warriors sa 22-all bago ­tinapos ng Perlas ang laban.

Nagpatuloy ang Perlas, umarangkada ng 5-0 sa fourth at saka itinala ang biggest lead 11-2 sa kill ni Dzi Gervacio.

“Mabuti nag-take charge si Myla kaya nakuha ­namin ‘yung panalo,” wika ni Pocari Sweat coach Rommel Abella.

Sa unang game, kumapit sa last two sets ang BaliPure para ipagpag ang Creamline 26-24, 17-25, 25-23, 28-26.

Pumalo ng 16 hits na kinapalooban ng 13 attack points si Risa Sato, may 15 points si Jerrili Malabanan at combined 22 points mula kina Grethcel­ Soltones at Aiko Urdas para itulak ang Water ­Defenders sa 4-1.

May 27 hits si Alyssa Valdez pero hindi napigil­ ang Cool Smashers sa pagdausdos sa 2-4.