Parehong nadesisyunan sa sagarang five sets ang dalawang laro ng Premier Volleyball League Reinforced Conference sa PhilSports Arena kagabi.
Sa main game, nasolo ng Power Smashers ang No. 4 spot matapos paluhurin ang Creamline 17-25, 25-22, 25-18, 18-25, 15-10.
Matapos matisod sa unang set, bantay-sarado na ng Power Smashers si volleyball superstar Alyssa Valdez kaya nakuha ang panalo sa sets 2 at 3.
Naka-puwersa ng decider ang Cool Smashers pero inakbayan nina Thai imports Tipachot Kannika at Hyapa Amporn kasama si local Mary Dominique Pacres ang Power Smashers para makuha ang pang-apat na panalo sa walong laro.
Hawak ng Power Smashers ang 10-5 bentahe, umiskor si Valdez ng tatlong sunod upang ibaba sa dalawang puntos ang hinahabol ng Creamline, 10-8.
Agad tumawag ng time-out si coach Nes Pamilar at pagbalik ng laro ay kumana ang Power smashers ng dalawang sunod na puntos para hawakan ang four-point lead.
Semplang sa pang-lima ang Cool Smashers tangan ang 3-5 card.
Sa first game, napakawalan ng BaliPure ang two-set lead pero nakabalik mula apat na puntos na pagkakaiwan sa decider para bawiin ang 25-21, 25-23, 16-25, 25-27, 15-10 panalo laban sa Perlas para palakasin ang tsansa sa semifinals.
May 24 points si import Jennifer Keddy sa Water Defenders na umangat sa 6-2 at hinigpitan ang kapit sa isa sa dalawang automatic semis berths ng season-opening conference na inorganisa ng Sports Vision.