Limang miyembro ng gunrunning syndicate ang napatay ng mga operatiba ng Quezon City District Special Operation Unit (DSOU) nang manlaban at mabaril ang isang pulis na tumayong buyer ng baril sa lungsod kahapon.
Sa inisyal na report kay Quezon City Police District (QCPD) director Police Chief Supt. Joselito Esquivel Jr., isa sa limang gunrunner na napatay ay nakilala lamang sa pangalang Michael Desuyo, tubong Pampanga.
Naganap ang engkuwentro sa pagitan ng mga operatiba ng QCPD-DSOU at mga miyembro ng gunrunning syndicate dakong alas-5:10 ng hapon kahapon sa De Vega Compound corner Dahlia at Iris Sts., Brgy. Fairview, QC.
Nakatanggap umano ng impormasyon ang mga awtoridad kaugnay sa iligal na pagbebenta ng mga baril ng mga suspek kaya agad silang nagkasa ng buy-bust operation laban sa mga ito.
Tumayong buyer si PO1 Ronald Pornea subalit nang makahalata umano ang mga suspek na pulis ang kanilang kaharap ay agad itong binaril kaya nasugatan. Agad namang naglabasan ang kanyang mga kasamahang pulis at niratrat ang sinasabing mga gunrunner.