Hindi kumbinsido ang Malacañang sa kredibilidad ng Rappler para ma­ging partner ng Facebook sa pagbabantay ng fake news sa bansa.

Inihayag ito ng Palas­yo kasunod ng pag-alma ng ilang grupo sa desisyon ng Facebook na gawing partner ang naturang online news site sa kanilang Third Party Fact Checker Program.

Sinabi ni Presidential Spokesman Salvador Pa­nelo na nirerespeto nila ang desisyon ng Facebook subalit kabalintunaan aniya na ang napili nila ay mayroon ding record ng pagpapakalat ng fake news at may reputasyon ng hindi pagiging patas sa administrasyon.

“We find it ironic, however that the one chosen by Facebook to verify posts by media putfits, bloggers has a record of spreading fake news. This, not to mention that its chosen partner also has a reputation of veing predisposed against majority, if not all, of the policies of this administration, as can be easily gleaned through the form of its published articles,” ani Panelo.

Nauna rito napaulat na ipina-ban ng Rappler sa Facebook ang Politiko website dahil umano sa isang fake news.

Pinalagan ng Politiko ang ginawa ng Rappler at may mga netizen din na pumuna sa naturang aksyon at kinuwestiyon ang pagiging fact-checker nito.

Sinabi ni Panelo na ipapaubaya nila sa mga netizen ang pagpapasya at pagdetermina kung alin sa mga media company ang gumagawa ng negatibong propaganda, hindi patas at hindi makatotohanang mga balita.

Umaasa rin ang Palas­yo na hindi maging susi ng censorship ang prog­rama ng Facebook sa mga magagandang programa ng pamahalaan.

“We leave the matter to the netizens in determining which online media outlet they wish to pat­ronize or believe in. We just hope that the prog­ram being pursued by Facebook will not evolve into a tool which censors the good news arising out of the programs of this administration,” ayon kay Panelo.

Naniniwala ang Palas­yo na matalino ang mga Pilipino at alam ang matitinong media company.

“They too have become more critical against those licensed media companies which resort to negative propaganda and biased and distorted stories,” dagdag pa ng kalihim.