Kinumpirma ng Philippine Overseas Employment Administration (POEA) sa pamamagitan ni POEA Administrator Hans Cacdac ang pagtigil sa recruitment ng mga manggagawang Pinoy patungong Saudi Arabia.
Walang ibinigay na petsa pero paglilinaw ni POEA Admin. Cacdac ay matagal nang hininto ng POEA ang deployment ng mga Pinoy OFWs sa Saudi.
Kung ganito ang sitwasyon dapat ay ipaalam ito ng POEA sa ating mga kababayang OFWs na patuloy na umaasang makakapagtrabaho sa ibang bansa kabilang sa Saudi Arabia.
Hanggang sa ngayon ay marami pa tayong mga kababayang OFWs ang naghihintay ng kanilang mga job orders sa Saudi mula sa mga inaplayang recruitment agencies.
Pinapangakuan ng kung anu-anong trabaho ng naglipanang mga recruitment agencies sa bansa pero ang katotohanan pala ay wala nang naghihintay na trabaho sa mga OFWs dahil inihinto na ng POEA ang deployment.
Ang deployment ban ay dapat na ipabatid ng POEA sa mga OFWs upang hindi na mabiktima pa ng mga recruiters. Kaawa-awa naman ang ating mga kababayang umaasang makakapagtrabaho sa Saudi gayong wala na palang naghihintay na trabaho sa kanila dahil ipinagbawal na ito ng gobyerno.
Pero para sa amin, tama lamang ang desisyong ito ng POEA dahil kaawa-awa lamang ang nangyayari sa mga kababayan natin sa Saudi na nawawalan ng trabaho.
Masyado silang naabuso dahil sa kawalan ng proteksyon sa kanilang mga employers ay nakakaligtaan na ring pagtuunan ng pansin ng mga opisyal ng ating gobyerno.
Mabuti na lamang at naluklok si Department of Labor Secretary Silvestre Bello na pinursige talagang tutukan ang kalagayan ng halos 9,000 mga stranded OFWs sa Saudi na hindi makauwi ng bansa dahil sa napakaraming problemang kinakaharap kagaya ng kawalan ng pamasahe pauwi ng Pilipinas.
Sa ngayon ay inaasikaso na ng DOLE ang lahat ng kailangan upang iproseso ang pagpapabalik ng bansa ng mga matagal nang stranded na mga OFWs sa Saudi at sana nga ay makauwi na sila sa lalong madaling panahon upang matapos na ang kanilang paghihirap at makasama na ang kanilang mga mahal sa buhay.