Nakatanggap ng assist si Alaska coach Jeff Cariaso mula sa dalawang Fil-Am ng katunggaling team sa PBA – sina Cliff Hodge ng Meralco at Chris Ross ng San Miguel Beer.
Inumpisahan ni Cariaso at ng Alaska team ang fund drive para makalikom ng pondo na pampasuweldo sa gameday personnel ng PBA habang suspendido ang Philippine Cup dahil sa coronavirus.
Nagsimula sa P100,000 ang pledge mula Aces, team governor Dickie Bachman at kay Cariaso pang-ayuda sa personnel na walang monthly salary tulad ng statisticians, table officials, gate keepers, entertainment personnel (blue boys), parking at operations personnel.
“My goal is to make up for at least 2 months worth of wages for those indifiduals relying heavily on the games,” pahayag ng The Jet.
Sa Twitter ay tumugon si Hodge.
“I will donate 20K to help in your cause, coach, let me know also if there is anything else I can do to help our PBA family,” aniya.
Hindi nagpahuli si Ross. “I’ll match!” sagot ni Ross sa naka-quote na tweet ni Hodge.
Patunay lang na sa ganitong pagkakataon, walang magkakalaban sa PBA. May assist na darating.
Sumama kinagabihan sa kawanggawa si Christian Jaymar ‘CJ’ Perez ng Columbian na magkakaloob naman ng P25,000. (Vladi Eduarte)