Noong offseason, hinugot ng Star si Ryan Roose “RR” Garcia mula Phoenix kapalit ng tatlong players. Tatlo para sa isa.

Nitong Linggo, pinakita ng 5-foot-10 guard na hindi sayang ang tiwalang binigay sa kanya ng Hotshots, pang-apat na team niya sa PBA sa loob ng tatlong seasons.

Inako ng dating FEU player ang trabaho ng tatlo, nag-take charge sa dulo ng regulation hanggang overtime para buhatin ang Star sa 105-102 win laban sa GlobalPort.

“We gave up a lot to get him, and he played like the three players we gave up,” lahad ni Hotshots coach Jason Webb.

Nilista ng 26-anyos na si Garcia ang best game suot ang jersey ng Star, nagkamada ng 26 points sa 11 of 13 shooting sa u­nang laro noong Linggo na naantala ng pagkawala ng kuryente sa Smart Araneta Coliseum.

Walong puntos ang iginuhit ni Garcia sa extra period, huli ang pressure-packed free throws mula sa deliberate foul ni Stanley Pringle na nagbi­gay sa Star ng unang panalo sa PBA Governors Cup.

Sa kanyang all-out effort, ginawad kay Garcia ang Accel-PBA Press Corps Player of the Week (July 18-24).