Kung dati ay pangarap lang, ngayon ay malapit na talagang magkaroon ng sariling version ng NASA ang Pilipinas.
Ito ay makaraang ipasa ng Kamara kamakailan ang House Bill 8541 (HB 8541) na kilala din bilang “Philippine Space Development Act.”
Sa tulong ng Department of Science and Technology (DOST), inihain ni Albay Rep. Joey Salceda ang HB 8541 at pinaboran ng 297 mambabatas na naglalayong magtalaga ng malinaw na ‘Philippine Space Development and Utilization policy’ at lumikha ng Philippine Space Agency (PhilSA).
Pungungunahan at isusulong ng PhilSA ang programang ‘space science and technology access and applications and space research’ kasama ang ‘remote sensing’ at pagkalap ng mahahalagang datos kaugnay ng mapanirang mga kalamidad, ayon kay Salceda.
Sagot din umano ito sa lumalaking pangangailan ng bansa sa seguridad at integridad ng teritoryo nito, bukod sa daan sa kalawakan.