Lalo umanong guguho ang tiwala ng publiko sa Philippine National Police (PNP) kung ibabaon lang sa limot ang secret jail sa Manila ­Police District (MPD) Station 1 at walang ­mapaparusahan.

Ito ang babala ni Siquijor­ Rep. Ramon Rocamora kaya inihain nito ang House Resolution (HR) 950 para hilingin sa Commission on Human Rights (CHR) na i-convene ang Oversight Committee sa ilalim ng Anti-torture Act na siyang mag-iimbestiga sa natuklasang secret jail sa Tondo,­ Manila.

“The Oversight Committee can assure the public of an unbiased and fair investigation. It includes chairpersons from the justice and human rights committees from both houses of Congress and also the minority leaders of both houses,” ani ­Rocamora.

Sinabi ng mambabatas na kailangang isang independent body at hindi lang ang PNP ang magsasagawa ng imbestigas­yon upang magkaroon ng makatotohanang resulta­ at maigawad ang nararapat na parusa sa mga nagkasalang kagawad ng PNP.

Kailangang magawa, aniya, ito sa lalong madaling panahon kung nais ng lahat na maisalba sa tuluyang pagguho ang tiwala ng taumbayan sa PNP bukod sa magpapagtuloy ang ganitong gawain ng mga tiwaling pulis kapag walang naparusahan sa nasabing insidente.

“If left unchecked, these violations of human­ rights can lead to a culture of impunity and erosion of public trust in our institutions,” ayon pa kay Rocamora.

Nais din ng mambabatas na palawakin ang imbestigasyon ng oversight committee kung gaano kalala ang pang-aabuso ng mga pulis sa kanilang kapangyarihan sa gitna ng giyera kontra ilegal na droga.

Base sa mga report, ikinukulong sa secret jail ang mga hinuling pinaghihinalaang sangkot sa ilegal na droga upang ipatubos sa kanilang kaanak kaya kahit ilang araw na sila sa kulungan ay hindi pa sila kinakasuhan.