SIBAKAN NA!

C O
Pres. Rodrigo Duterte

Nanggigigil na ipinahayag ni Pangulong Rodrigo Duterte na may sisibakin itong dalawang mataas na opisyal ng gobyerno, pagbalik ng Pilipinas mula sa state visit sa Singapore.

Ang anunsyo hinggil sa gagawing pagsibak ay ginawa ng Pangulo kagabi sa harap ng Filipino community sa Singapore.

Sa kanyang talumpati sa Filipino community, binigyang diin ng Pangulo na hindi niya papayagang umiral pa muli ang korapsyon sa kanyang administrasyon at sa loob ng kanyang termino.

“I will assure you corruption will stop. Learn to be assertive. Ako, may i-fire out ako ngayon dalawa pag-uwi ko ngayon, mayroon akong sabihin talaga na paalisin ko. Mataas na opisyal, malaman nila ‘yan,” pagbibigay-diin ng Pangulong Duterte.

Bunsod nito sinabi ni PDu30 na hindi nito kursunada na makatanggap ng impormasyon na may nadadawit sa anomalya.

Giit ng Pangulo, kahit pa sa pormang bulong lamang maiparating sa kanya ang impormasyon ay hindi na siya susugal pa na panatilihin sa puwesto ang tiwaling opisyal.

Mas mabuti aniyang sipain na lang sa puwesto ang mga kurakot.

Kaugnay nito, hindi naman tinukoy ni PDu30 kung sino ang dalawang opisyal na kanyang sisibakin.

“Sinabi ko na sa inyo lahat hinigpitan ko… Even a whisper maski bulong lang paalisin na lang kita kaysa magsugal pa ako. If I’m in doubt you better go,” sabi pa ng Pangulo.

Samantala, nagbitiw na sa tungkulin ang dalawang opisyales ng Bureau of Immigration (BI) na sina Deputy Commissioner Al Argosino at Mike Robles matapos masangkot sa umano’y pangingikil ng P50 milyon sa casino tycoon na si Jack Lam.

Sa liham ng dalawang BI commissioners, sinabi nilang minabuti nila ang pagbibitiw upang ilayo sa kontrobersya si Pangulong Duterte.

“Today, we learned that Wally Sombero filed an Ombudsman case for anti-graft and corrupt practices against us. Now that both cases have already been filed, it is time for the truth to prevail. To spare the Honorable President from the troubles brought about by the false allegation hurled by Mr. Wally Sombero, we are tendering our resignation effective immediately.”

Magugunitang ang dalawang BI officials ay nakuhanan ng CCTV na tinatanggap ang milyun-milyong halaga ng pera mula kay Sombero na anila’y bahagi lamang ng kanilang ginagawang imbestigasyon subalit pinabulaanan naman ni Sombero.