May pangamba ang ibang ordinaryong mamamayan na baka nakasentro na lamang sa iligal na droga ang ating pamunuan ng Philippine National Police (PNP) at nakakaligtaan na ang pagsugpo sa iba pang kriminalidad.
Bagama’t maaaring ang iba pang krimen ay nag-ugat sa bawal na gamot gaya ng holdapan, akyat-bahay, rape at homicide o murder, dapat ding tutukan ang mabilis na paglutas at agad na paghuli sa mga suspek.
Ang binabanggit natin ay kagaya ng pagkadakip sa suspek sa brutal na pagpatay sa isang nurse ng St. Luke’s Medical Center.
Kinilala ni Quezon City Police District (QCPD) Director Senior Supt. Guillermo Eleazar ang suspek na si Jeffrey Guarin, 22, na dati nang sumuko sa ilalim ng Oplan Tokhang noong July 15.
Inamin ni Guarin na lango siya sa iligal na droga nang kanyang gawin ang pagpatay sa biktimang si September Ann Paz, 24, na nagtamo ng 19 na saksak sa katawan.
Isa pang krimen ay ang pamamaril sa anak ni Quinnie Casimiro ng ABS-CBN Zamboanga.
Si Jan Dexter Rafael Concepcion, isang IT specialist, ay binaril noong August 8 sa harap ng Avida Condominium sa EDSA, Brgy. Bagong Pag-asa sa Quezon City ng dalawang lalaki na nagtangkang nakawin ang kanyang cellphone habang siya ay naglalakad.
Sa follow-up operation ng QCPD noong August 17 at August 19, magkasunod na naaresto sina Ronnie Espinosa at Ariel Acaso.
Hindi pa masabi kung konektado sa droga o gumagamit ng drugs ang mga salarin, ang importante mahuli agad at maipakulong ang mga suspek.
Isa pang matagumpay na operasyon ng QCPD ay ang pagkakapatay sa kilabot na pinuno ng isang gun-for-hire gang na nag-o-operate sa Region 3, Region 5 at Metro Manila.
Ang napaslang ay si Glen Peregrino Ebio, 31, na matagal nang may standing warrant of arrest para sa kasong murder, at isa pang lalaki na hinihinalang miyembro rin ng sindikato.
Noong July 12, nagawa namang mapilayan ng QCPD ang kilabot na Asero Drug Group makaraang mapatay sa engkuwentro ang pinuno at apat na miyembro ng sindikato sa ginawang buy-bust operation ng Anti-Drug operatives ng QCPD Station 4 sa Novaliches.
Gusto nating papurihan si Senior Supt. Eleazar. Mayroon siyang kakaibang momentum sa paglaban sa krimen. Hindi lamang siya naka-focus sa iligal na droga kundi sa pangkalahatang kriminalidad.
Maganda ang feedback natin dito kay Sr. Supt. Eleazar na nabansagan nang “purger” o maninibak dahil sa dami ng mga tauhan sa QCPD na kanyang inalis sa puwesto na aabot na sa 150.
Iyan ang mga hinahanap nating magpapabago sa imahe ng PNP. Dapat ay mabilis, matapang at masigasig na pag-aksyon laban sa krimen.
Pero kung may bad policemen, pinangunahan naman mismo ni Sr. Supt. Eleazar ang pag-promote sa 627 pulis ng QCPD patungo sa ranggong PO2, PO3 at PO4. Ito ay mga ordinaryong pulis at hindi mga opisyal.
Giit ni Sr. Supt. Eleazar, naniniwala siya sa prinsipyong “reward the good, reject the bad”. Ito ay pagpapakita lamang na siya ay patas sa pagtrato sa kanyang mga tauhan.
Sibakin nga naman ang mga may bahid ang integridad, pero bigyang-pagkilala ang mga tunay na nagsisilbi sa taumbayan.
Ituloy lang ninyo ‘yan, sir. Mahalaga na tutukan din ang iba pang krimen maliban sa problema sa drugs.