Isang buwang suspendido ang operasyon ng Uber System Inc., ayon sa ipinalabas na kautusan ng Land Transportation Franchising and Regulatory Board (LTFRB) kahapon.
Kasabay nito, inutos na ang pagpapatigil sa operasyon ng online booking application ng Uber sa panahon na umiiral ang suspension order. Ang cease and desist order ay may petsang August 14, 2017.
Ang suspensyon ay may kaugnayan sa pagsuway umano ng Uber sa naunang kautusan ng LTFRB na pagbabawal sa karagdagang accreditation ng Transport Network Vehicles Services (TNVS).
Ayon kay Atty. Aileen Lizada, board member ng LTFRB, ngayong araw pasisimulan ng mga enforcer ng Metropolitan Manila Development Authority, Highway Patrol Group, Land Transportation Office at LTFRB enforcers ang panghuhuli sa mga drayber ng Uber na lalabag sa suspension order.
“Likewise, the Board shall hold Respondent (Uber) responsible for all its accredited ‘colorum’ TNVS apprehended during the period of suspension should it be discovered that they are accepting passengers using their mobile application,” nakasaad sa suspension order.