Kung gaano sumiklab ang galit ng mga netizens sa viral video ng pagpatay sa isang biker sa Maynila, nagngingitngit pa rin ang mga ito nang kumalat na ang balita kahapon ng umaga kaugnay ng pagkakaaresto sa suspek na si Philippine Army reservist Vhon Tanto sa lalawigan ng Masbate.

Marami sa mga netizens ang nanawagan na unahin umano si Tanto na isampol sa death pe­nalty upang hindi na umano dumami pa ang mga katulad nito.

Sa Facebook page na nakapangalan kay Phi­lippine National Police (PNP) Director Gene­ral Ronald ‘Bato’ Dela Rosa, kung saan naka-post ang litrato ni Tanto kasama ang ilan sa mga umaresto sa kanya, ay pinuna rin ng ilang netizens kung bakit hindi ito nakaposas gayung idineklarang “armed and dangerous” matapos na magtago sa loob ng ilang araw bago naaresto sa Masbate.

Samantala, sa isang press conference kagabi, sinabi ni Dela Rosa na makakatanggap ng “villains welcome” si Tanto pagdating nito sa Maynila upang harapin ang mga kasong isasampa laban sa kanya.

Inihayag din ng PNP chief na ibibiyahe kagabi si Tanto pabalik ng Maynila at may mga escort na kasama ito.

Inaasahan aniyang darating ang mga ito ngayong Sabado ng umaga sa Manila Police District (MPD) kung saan isasalang si Tanto sa inquest proceedings.

“Pagdating niya dun bukas ay puntahan natin. We will give him a villain’s welcome. Not a hero’s welcome, but a villain’s welcome,” paha­yag ni Dela Rosa.

Inaabangan na rin sa MPD headquarters sa Uni­ted Nations Avenue, Maynila ang pagdating ni Tanto na naaresto dakong alas-11:40 ng umaga kahapon sa Brgy. Mangat, Mi­lagros, Masbate ng mga miyembro ng Philippine Army-Intelligence Group kasama ang lokal na pulisya.

Ayon kay Senior Ins­pector Rommel Anicete, hepe ng MPD-Homicide Section, kaagad na isasampa ang kasong murder at frustrated murder laban kay Tanto sa Manila Pro­secutor’s Office kaugnay sa pagkamatay ni Geralde at malubhang pagkasu­gat ng stray bullet victim na si Rocell Bondoc, 2nd year phy­sical therapy student ng Universidad De Manila. (With Juliet de Loza-Cudia)