Utos sa AMLC, political bluff

antonio-trillanes-iv

Tinawag ni Senator Antonio Trillanes IV na “political bluff” ang ipinalabas na kautusan ni Pangulong Rodrigo Duterte sa Anti-Money­ Laundering Council (AMLC) para isapubliko ang kanyang net worth o taglay na kayamanan.

Ani Trillanes, hanggang salita na lamang ang naturang kautusan ng Pangulo dahil hindi rin naman aaksiyon ang isang ahensiya kung walang formal written request.

“Political bluff lang ‘yang panawagan niya sa AMLC kasi alam niya na hindi naman ito gagalaw basta-basta nang walang formal written request. At kahit na meron­ man, hindi mandato ng AMLC na magbilang ng net worth ng sino man,” ayon kay Trillanes kasabay ng pana­wagan sa Pangulo na: “Tama na ‘yang mga bola mo, Mr. President, buksan mo na kung wala kang tinatago.”

Kung tunay na wala umanong tinatago at malinis ang Pangulo, ang dapat nitong gawin ay pumirma ng waiver para sa bangko upang makita ng publiko ang tran­saction history ng mga ­accounts nito.

“Kaya ang pinakamadali ay pumirma siya ng waiver ng bank secrecy na addressed sa bangko para makita ng publiko ang transaction history ng mga accounts niya,” ayon kay Trillanes.

Magugunitang noong Huwebes, ay muling­ ­inungkat ng senador­ ang ukol sa mahigit­ P2-bilyong­ bank accounts umano ni Duterte.