Iniutos kahapon ng Sandiganbayan ang pagsuspinde ng 90-araw kay Camarines Sur Rep. Luis Raymund Villafuerte bunsod ng kasong kriminal na kinahaharap nito.

Kasabay nito ay nagpaalam si Villafuerte kay Speaker Gloria Macapagal-Arroyo na boluntaryo itong sasailalim sa preventive suspension.

Nakapaloob ito sa liham na pinadala ni Villafuerte kay SGMA.

“While I firmly believe that only the House of Representatives has the authority to discipline its members, I would like to inform your good office that I am nonetheless voluntarily submitting to the said preventive suspension for a period of 90-days effective 11 February 2019 or until 12 May 2019,”
Si Villafuerte ay inaakusahang nanghimasok sa kontrata ng isang security agency na hindi umano dumaan sa tamang proseso.

Dati na ring sinuspinde ng Sandiganbayan si Villafuerte dahil sa iba pang kaso na may kinalaman sa graft.

Kasabay nito naghain din si Villafuerte ng mosyon na humihiling na payagan siyang bumiyahe sa Hong Kong mula Marso 1-4.

Bukod kay Villafuerte kasama din sa kaso sina Leticia Aliorde, provincial accountant, Richard Rivera, Executive Assistant, Bernadette Carlos, Rural Health physician, at Gerardo Villafuerte, medical officer 3.