VP Leni nangangarap para sa OFWs

Nangangarap si Vice President Leni Robredo na darating ang araw na ang pagtatrabaho ng mga Filipino­ sa ibang bansa ay sariling desisyon na lang at hindi dahil kailangang mabuhay ng mga ito ang kanilang pamilya sa Pilipinas.

Sa kanyang pagsasalita sa Get Together and Meet sa mga University of the Philippines Association na naka­base sa San Francisco at iba pang Filipino-American Communities na ginanap sa Kalayaan Hall ng Philippine Center sa San Francisco, USA, nagbigay-pugay si Robredo sa mga Overseas Filipino Workers (OFWs) dahil sa kontribusyon ng mga ito sa ekonomiya ng bansa.

Patunay dito, aniya, ang US$10.86 billion na remittances ng mga Filipino workers sa iba’t ibang panig ng mundo sa nakaraang 5 buwan ng taong kasaluku­yan o katumbas ng mahigit US$2 billion kada buwan.

Aniya pa, kaya lang nagtatrabaho ang karamihan sa mga Filipino sa ibang bansa ay dahil kailangan nila ito para mabigyan ng maayos na buhay ang kanilang pamilya.

Ito ang nais umanong mabago ni Robredo na magagawa lamang, aniya, kapag nagtulung-tulong ang lahat.

“Let’s bring every single Filipino to the center back home — if they choose to do so. Working and living overseas will then be a choice, more than a need,” dagdag pa ng mambabatas.